Nu pianefforte ’e notte
sona, luntanamente,
e ’a museca se sente
per ll’aria suspirà.

È ll’una: dorme ’o vico
ncopp’ a sta nonna nonna
’e nu mutivo antico
’e tanto tiempo fa.

Dio, quante stelle ’ncielo!
Che luna! E c’aria doce!
Quanto na bella voce
vurria sentì cantà!

Ma sulitario e lento
more ’o mutivo antico;
se fa cchiù cupo ’o vico
dint’a ll’oscurità.

L’anema mia surtanto
rummane a sta fenesta.
Aspetta ancòra. E resta,
ncantànnose, a penzà.

Salvatore Di Giacomo

Foto RETE